Трендови

Најновите податоци од истражувањето за иновативните активности на македонските претпријатија објавени од Државниот Завод за Статистика на 15.04.2020, собрани според методологијата на Европската Унија (Community Innovation Survey) за периодот 2016-2018 та година укажуваат дека високите трошоци поврзани со воведувањето на иновациите и немањето на финансиски средства за истото продолжуваат да бидат најголемата пречка за иновативните активности на македонските претпријатија.

Истражувањето се спроведува на мали, средни и големи претпријатија кои работат во тесен круг на индустриски сектори, и кои имаат повеќе од 10 вработени.  Овие претпријатија во периодот од 2016-2018 та година биле 3198, додека од нив 55% пријавиле воведување на нова иновација.  Од претпријатијата кои вовеле иновации, дури 55% вовеле иновација на производ и процес, 26% вовеле иновација само на нов процес, додека околу 17% вовеле иновација на производ/услуга. Најмногу иновации се бележат во секторот Снабдување со електрична енергија, гас, пареа и климатизација (89.5 %), потоа Маркетинг (реклами и пропаганда) и истражување на пазарот (78.1 %), Информации и комуникации (77.5 %), а најмал процент на иновации се бележат во секторот Научно истражување и развој (23.5 %).

Претпријатијата кои вовеле нов процес, а кои се најмногубројни, најмногу вожиле во нови методи за распределба на активностите, донесување на одлуки и управување со човечките ресурси. 

Типот на инвестиции ги потврдуваат овие активности на иновативните претрпијатија. Повеќе од 75% од претпријатијата кои имале иновативни активности вложиле во развивање на софтвер, работа со бази и аналитика. 

Значителен дел од претпријатијата кои имале иновативни активности укажале дека регулативите и законодавството позитивно влијаеле врз нивните иновациски активности во периодот 2016-2018, најмногу во делот на вработувањето, а потоа и во делот на животната средина.

Најголемите пречки за воведување на иновации во македонските претрпијатија се уште се високите трошоци поврзани со воведувањето на иновациите и немањето на финансиски средства за истото.

Истражувањето во Северна Македонија го спроведува Државниот Завод За Статистика. Наодите можете да ги видите на слениот линк.